परभणी ➡️ भारतीय कृषी संशोधन संस्था दिल्ली येथील संशोधन सहसंचालक प्रा. इंद्र मणी मिश्रा यांची परभणी येथील वसंतराव नाईक मराठवाडा कृषी विद्यापीठाच्या कुलगुरूपदी नियुक्ती करण्यात आली आहे. राज्यपाल तथा विद्यापीठाचे कुलपती श्री भगतसिंह कोश्यारी यांनी आज गुरुवारी (दि.१४) डॉ. इंद्र मणी मिश्रा यांची नियुक्ती जाहीर केली.
वसंतराव नाईक मराठवाडा कृषी विद्यापीठाच्या कुलगुरू डॉ. अशोक ढवण यांचा कार्यकाळ दिनांक ६ मे २०२२ रोजी संपल्यामुळे विद्यापीठाचे कुलगुरुपद रिक्त झाले होते. डॉ.बाबासाहेब आंबेडकर मराठवाडा विद्यापीठाचे कुलगुरु डॉ. प्रमोद येवले यांच्याकडे या पदाचा अतिरिक्त कार्यभार देण्यात आला होता.
डॉ.इंद्र मणी यांनी भारतीय कृषी संशोधन संस्था नवी दिल्ली येथून कृषी अभियांत्रिकी या विषयात एम.एससी. व पीएच.डी. प्राप्त केली असून त्यांना अध्यापन, संशोधन, प्रशासकीय कार्य व कृषी विस्तार सेवेचा व्यापक अनुभव आहे.
कुलगुरू नियुक्तीसाठी राज्यपालांनी एनसीईआरटीचे निवृत्त महासंचालक प्रा. जगमोहन सिंह राजपुत, यांच्या अध्यक्षतेखाली निवड समिती गठीत केली होती. भारतीय कृषि संशोधन संस्थेचे संचालक डॉ.ए.के.सिंह व राज्याच्या कृषि विभागाचे सचिव एकनाथ डवले हे या समितीचे सदस्य होते. समितीने शिफारस केलेल्या उमेदवारांच्या प्रत्यक्ष मुलाखती घेतल्यानंतर राज्यपालांनी डॉ.इंद्र मणी यांच्या निवडीची घोषणा केली.
0 Comments