🔰 केंद्र सरकारविरोधात झरी येथे संयुक्त किसान मोर्चाच्या वतीने चक्का जाम

परभणी ➡️ ऑक्टोबर 2021 च्या अतिवृष्टीच्या अनुदानासह सरसकट खरीप व रब्बी पीक कर्ज पेरणीच्या आत शेतकऱ्यांना अदा करण्यात यावे व मागील दोन वर्षाचा पिक विमा नुकसान भरपाई अशा विविध मागण्यांसाठी परभणी - जिंतूर मार्गावरील झरी येथे आज 31 जुलै रोजी रविवारी (दि.31) रास्ता रोको आंदोलन करण्यात आला.

 

केंद्र सरकारच्या विरोधात देशभर चक्काजाम करण्यात येत असून याचाच भाग म्हणून या आंदोलनात सर्व शेतीमालाला हमीभाव जाहीर करा व त्यास कायद्याचे संरक्षण द्या, रद्द केलेले तीन कृषी कायदे मागील दरवाज्याने परत आणू नका, सांगली व कोल्हापूरच्या धर्तीवर 2019 च्या शासन आदेशानुसार परभणी तालुक्यातील शेतकऱ्यांना नुकसान भरपाई द्या, अग्निवीर योजना रद्द करा, धरण क्षेत्रातील व सर्व नद्या पात्रातील शेतीचे वेगळे पंचनामे करून तात्काळ मोबदला द्या , ग्रामीण भागातील सक्तीची  वीज बील वसुली तात्काळ थांबवा व वीज कनेक्शन सुरळीत करा, शेतकऱ्यांसह सर्व कष्टकऱ्यांना संपूर्ण औषध उपचार मोफत द्या आदी मागण्यासाठी संयुक्त किसान मोर्चाच्या वतीने आज झरी येथे रास्ता रोको आंदोलन करण्यात आले.

 WWW.VNSNEWS-24.COM

यावेळी स्वराज इंडिया पार्टीचे जिल्हा अध्यक्ष गोविंद गिरी, स्वाभिमानी शेतकरी संघटनेचे केशव आरमळ, माणिक कदम, प्रहार जनशक्ती पक्षाचे रोहिदास बोबडे, डॉ.गोविंदा कामटे, अभिजित देशमुख, पांडुरंग जाधव, पिंटू कदम, बबन चट्टे यांच्यासह मोठ्या संख्येने शेतकरी व कार्यकर्ते आंदोलनात सहभागी झाले होते.