💠 श्री शिवाजी महाविद्यालयातील सहयोगी प्राध्यापक ए.बी.टेकाळे सेवानिवृत्त, रसायनशास्त्र विभागातर्फे भावपूर्ण निरोप

परभणी ➡️ येथील श्री शिवाजी महाविद्यालयातील रसायनशास्त्र विभागातील सहयोगी प्राध्यापक आत्म भाऊराव टेकाळे हे नियत वयोमानानुसार मंगळवारी (दि.31)  सेवानिवृत्त झाले आहेत. त्यांनी 32 वर्षे 10 महिने अध्ययन व अध्यापनाचे काम केले आहे. याबद्दल त्यांचा रसायनशास्त्र विभागातर्फे एका कार्यक्रमात त्यांचा सत्कार करून भावपूर्ण  निरोप  देण्यात आला.रसायनशास्त्र विभागाच्या वतीने आज दुपारी  कार्यक्रमाचे आयोजन करण्यात आले होते. 

या कार्यक्रमास विभागप्रमुख प्रा. डॉ.सुभाष लोणकर यांच्या हस्ते सहयोगी प्रा. टेकाळे यांचा शाल, श्रीफळ व पुष्पगुच्छ तसेच भेटवस्तू देऊन सत्कार करण्यात आला. याप्रसंगी प्रा.डॉ. सुरज आडे, प्रा.डॉ. नानासाहेब शितोळे, प्रा. डॉ.गंगाधर गुंडलेवाड, प्रा. माधव जाधव, प्रा.डॉ. प्रशांत जगताप, प्रा. संतोष कांबळे, अशोक कलंबरकर, इंगळे, दासू मस्के, मनोज क्षीरसागर यांच्यासह कर्मचारी उपस्थित होते.

ए.बी.टेकाळे हे परभणी जिल्ह्यातील देवनांद्रा (ता.पाथरी) येथील मूळ रहिवासी आहेत. शालेय शिक्षण गावातच झाले. पुढे इयत्ता दहावीपर्यंत ते  पाथरी येथील जिल्हा परिषद हायस्कूलमध्ये शिकले. अकरावी ते बी.एसस्सी.पर्यंतचे त्यांचे शिक्षण मानवतच्या के.के.एम.महाविद्यालयात झाले. औंरंगाबाद येथे 1987 ते 1989 या काळात मराठवाडा विद्यापीठात त्यांनी एम.एसस्सी.चे शिक्षण पूर्ण केले. 

पैंठण येथे प्रतिष्ठान शिक्षण प्रसारक मंडळाच्या प्रतिष्ठान कला, विज्ञान व वाणिज्य महाविद्यालयात त्यांना प्राध्यापक पदावर त्यांना नियुक्ती मिळाली. 1 ऑगस्ट 1989 ते 15 जून 1990 या कालावधीत त्यांनी त्या महाविद्यालयात अध्यापन केले.

 त्यांनतर 1 ऑगस्ट 1990 रोजी परभणी येथे मराठवाडा शिक्षण प्रसारक मंडळाच्या श्री शिवाजी महाविद्यालयात रसायनशास्त्र विषयाचे प्राध्यापक म्हणून ते रुजू झाले. दरम्यान, काही काळ बीड येथे बलभीम महाविद्यालय, औंरंगाबाद येथे देवगिरी महाविद्यालयातही त्यांनी काम केले आहे. त्यांनी औंरंगाबादच्या डॉ.बाबासाहेब आंबेडकर मराठवाडा विद्यापीठात पीएच.डी.साठी दोन वर्षे संशोधन कार्य केले आहे. 

रसायनशास्त्र विभागात कार्यरत असताना पदवी व पदव्युत्तर विद्यार्थ्यांना रसायनशास्त्र, भौंतिकी रसायनशास्त्र, पृथ:करणीय रसायनशास्त्र या विषयाचे अध्यापन त्यांनी केलेले आहे. प्रा.टेकाळे यांचे 4 शोधनिबंध व एक शोधपत्रिका आंतरराष्ट्रीय स्तरावरील जर्नलमध्ये प्रकाशित झालेले आहेत. श्री शिवाजी महाविद्यालय, परभणी येथून सहयोगी प्राध्यापक म्हणून ते सेवानिवृत्त होत आहे. त्यांचे विद्यार्थी विविध क्षेत्रात कार्यरत आहेत.